ТЕҲРОН, 4 август. /«Дунё» АА/. Олий Мажлис Қонунчилик палатаси Спикери Нурдинжон Исмоилов бошчилигидаги Ўзбекистон делегацияси Эрон Президенти инаугурация маросимида иштирок этиш учун Теҳронга келди, деб хабар бермоқда «Дунё» АА мухбири.
Ўзбекистоннинг Эрондаги элчихонасидан маълум қилинишича, Теҳрон халқаро аэропортида Ўзбекистон делегациясини Эрон Исломий Кенгаш Мажлисининг Миллий хавфсизлик ва ташқи сиёсат масалалари бўйича қўмитаси раиси Б.Раҳимий кутиб олди.
Эрон Исломий Кенгаш Мажлисининг қўмита раиси Ўзбекистон делегациясини Эронга ташрифи билан қутлар экан, Олий Мажлис Қонунчилик палатаси Спикерининг ушбу сиёсий тадбирда иштироки икки мамлакат ўртасидаги ҳамкорлик алоқаларини янада мустаҳкамлаш ва ривожлантиришга катта ҳисса қўшажагини билдирди.
Б.Раҳимийнинг айтишича, Ўзбекистонда сиёсий, ижтимоий ва иқтисодий соҳаларда юз бераётган катта ўзгаришлар Эрон сиёсий доиралари, айниқса парламенти вакиллари томонидан юқори баҳоланмоқда. Эрон парламенти вакили Президент Шавкат Мирзиёев томонидан амалга оширилаётган яхши қўшничилик алоқаларини мустаҳкамлашга қаратилган конструктив ва очиқ ташқи сиёсатни эътироф этди.
Ўзбекистон Олий Мажлиси Қонунчилик палатаси Спикери Нурдинжон Исмоилов бугун янги сайланган Эрон Президенти Иброҳим Раисий томонидан қабул қилинади.
Эрон Президентининг инаугурация маросимида 73та давлатдан 115 нафар олий ва юқори мартабали меҳмонлар бошчилигидаги делегацияларнинг иштирок этиши кутилмоқда.
